बाल विकास कार्यक्रम नेपालको आयोजनामा कैलाशमा निःशुल्क स्वास्थ्य शिविर, ४९० जनाले लिए सेवा

मकवानपुर । सामुदायिक विकास कार्यक्रम नेपाल (सीडीपीएन) को आयोजना तथा चुरे हिल सामुदायिक चिकित्सा केन्द्र, हेटौँडा र कैलाश गाउँपालिकाको सहयोगमा मकवानपुरको कैलाश गाउँपालिका–भाल्टारमा एकदिने निःशुल्क स्वास्थ्य शिविर सम्पन्न भएको छ।
स्थानीय बासिन्दाको स्वास्थ्य सेवामा पहुँच विस्तार गर्ने उद्देश्यले आयोजित शिविरमा करिब ४९० जनाले स्वास्थ्य परीक्षण तथा चिकित्सकीय परामर्श सेवा लिएका छन्। शिविरमा विभिन्न रोगका विशेषज्ञ चिकित्सकबाट स्वास्थ्य परीक्षण, परामर्श तथा आवश्यक औषधि निःशुल्क वितरण गरिएको थियो।
शिविरमा स्त्रीरोग, दन्तरोग, हाडजोर्नी तथा नसासम्बन्धी रोग, सामान्य चिकित्सा, बालरोग र भिडियो एक्स–रेलगायतका सेवा प्रदान गरिएको थियो। विभिन्न स्वास्थ्य समस्याबाट प्रभावित स्थानीय बासिन्दाले शिविरबाट स्वास्थ्य परीक्षण तथा उपचारसम्बन्धी परामर्श प्राप्त गरेका थिए।
शिविरपश्चात् आयोजित समीक्षा बैठकमा सहभागी चिकित्सकहरूले स्वास्थ्य परीक्षणका क्रममा देखिएका प्रमुख स्वास्थ्य समस्याबारे जानकारी दिएका थिए। उनीहरूका अनुसार शिविरमा आएका बिरामीमध्ये मिर्गौलामा पत्थरी, छालासम्बन्धी समस्या र दन्तरोग भएका बिरामीको सङ्ख्या बढी थियो।
चिकित्सकहरूको अवलोकनले ग्रामीण क्षेत्रमा नियमित स्वास्थ्य परीक्षण, रोगको समयमै पहिचान र आवश्यक उपचार तथा परामर्श सेवाको महत्त्वलाई उजागर गरेको छ। विशेषगरी विशेषज्ञ चिकित्सक तथा स्वास्थ्य परीक्षण सुविधामा सहज पहुँच नपुगेका समुदायका लागि यस्ता शिविर उपयोगी हुने अपेक्षा गरिएको छ।
सीडीपीएनले सन् २०१७ देखि कैलाश गाउँपालिकामा विभिन्न विकासमूलक परियोजना सञ्चालन गर्दै आएको छ। संस्थाले बाल शिक्षा, बाल स्वास्थ्य, सामुदायिक विकास तथा आयआर्जनका क्षेत्रमा निरन्तर काम गर्दै आएको छ।
समुदायको समग्र विकास र स्थानीय बासिन्दाको जीवनस्तर सुधार गर्ने उद्देश्यले काम गर्दै आएको संस्थाले स्वास्थ्यलगायतका क्षेत्रमा समुदायलाई सहयोग पुर्‍याउँदै आएको छ। विकास साझेदार संस्था, स्वास्थ्य सेवा प्रदायक र स्थानीय सरकारबीचको सहकार्यले ग्रामीण समुदायको स्वास्थ्य आवश्यकता सम्बोधन गर्न तथा स्वास्थ्य सेवामा पहुँच विस्तार गर्न महत्त्वपूर्ण योगदान पुर्‍याउने अपेक्षा गरिएको छ।

खबरपाटी