प्रतिनिधिसभा बैठक शुक्रबार १ बजेसम्मका लागि स्थगित

काठमाडौँ । प्रतिनिधि सभा बैठक शुक्रबार दिउँसो १ बजेसम्मका लागि स्थगित भएको छ । सभामुख देवराज घिमिरेले भोलि दिउँसो १ बजे बस्ने गरी संसद् बैठक स्थगित गरेका हुन् । 

प्रतिनिधिसभा सुरु हुने बितिकै प्रतिपक्षी दलका सांसदहरुले उठेर विरोध जनाएका थिए । भिजिट भिसा प्रकरणमा छानबिन समिति गठन गर्नुपर्ने माग राख्दै उनीहरुले विरोध जनाएका हुन् ।

उनीहरुले विरोध जनाएपछि सभामुख देवराज घिमिरेले संसद सांसदहरुको बोल्ने थलो भएकाले जनताको मुद्दामाथि बहस गर्ने वातावरण बनाउन आग्रह गरेका थिए । 

संसद् खुलाउने प्रयास भने जारी छ । आज मात्रै विपक्षी दलहरूले सत्तारुढ दल नेपाली कांग्रेस र नेकपा एमालेसँग भिजिट भिसा प्रकरणमा छानबिन समिति बनाउन गरेको प्रस्तावपछि सत्तापक्ष आन्तरिक छलफलमा जुटेको छ । 

नयाँ बानेश्वरस्थित संसद् भवनमा भएको दलहरूको छलफलमा कांग्रेस–एमालेसमक्ष विपक्षी दलले छानबिन समितिको प्रतिबद्धता जनाउन प्रस्ताव गरेका हुन् । 

भिजिट भिसा प्रकरणमा छानबिन समिति माग गर्दै प्रतिपक्षी दलहरुले संसद् अवरोध गर्दै आएका छन् । जेठ १३ गतेदेखि प्रतिनिधि सभा बैठक अवरुद्ध हुँदै आएको छ । 

खबरपाटी