जन्मसिद्ध नागरिकता खोस्ने ट्रम्पको नयाँ कदममा धक्का

काठमाडौं - अमेरिकी राष्ट्रपति डोनाल्ड ट्रम्पले जन्मसिद्ध नागरिकता सम्बन्धी प्रावधानलाई सीमित गर्ने उद्देश्यले जारी गरेको नयाँ कार्यकारी आदेशमाथि एक अमेरिकी संघीय न्यायाधीशले आंशिक रोक लगाएकी छन्। 

सर्वोच्च अदालतले गत जुन महिनामा पनि ट्रम्पको पहिलो कार्यकारी आदेशलाई असंवैधानिक ठहर गर्दै खारेज गरिदिएपछि ट्रम्प प्रशासनले ल्याएको यो संशोधित नीतिमाथि पुनः कानुनी धक्का लागेको हो।  

अमेरिकी जिल्ला न्यायाधीश डेबोरा बोर्डम्यानले बुधबार आदेश जारी गर्दै प्रशासनले यो नयाँ नीति तत्काल लागु गर्न नपाउने स्पष्ट पारेकी छन्। यद्यपि, उनले सम्बन्धित सरकारी निकायहरूलाई यो नीति कसरी कार्यान्वयन गर्न सकिन्छ भन्ने विषयमा मार्गनिर्देशन तयार पार्ने काम जारी राख्न भने अनुमति दिएकी छन्। 

प्रारम्भिक रोक जारी गर्दै न्यायाधीश बोर्डम्यानले ट्रम्पको नयाँ नीति पनि अमेरिकी सर्वोच्च अदालतको हालैको फैसला विपरीत र असंवैधानिक हुने सम्भावना उच्च रहेको उल्लेख गरेकी छन्।  

अमेरिकी संविधानको १४औँ संशोधनले अमेरिकी भूमिमा जन्मिने जुनसुकै व्यक्तिलाई आमाबाबुको विदेशी नागरिक भए पनि स्वतः नागरिकताको अधिकार प्रदान गर्छ। ट्रम्प प्रशासनले संशोधित आदेशमार्फत यसको कानुनी दायरा अझ साँघुरो पार्ने प्रयास गरेको थियो। 

अमेरिकी महान्यायाधिवक्ता टोड ब्लान्चले सर्वोच्च अदालतको पछिल्लो फैसलालाई ध्यानमा राखेरै नयाँ आदेश तयार पारिएको दाबी गरेका छन्। अदालतको यो निर्णयबाट आफूहरू आश्चर्यचकित नभएको र आवश्यक परे पुनः सर्वोच्च अदालतसम्म पुग्न तयार रहेको उनले बताएका छन्।

खबरपाटी