मेक्सिको ४० वर्षपछि नकआउट चरणमा

काठमाडौं - मेक्सिकोले विश्वकप  फुटबलको इतिहासमा एक स्वर्णिम पाना थपेको छ। 

घरेलु मैदान एस्टेका रंगशालामा भएको रोमाञ्चक खेलमा इक्वेडरलाई २–० ले पाखा लगाउँदै सह-आयोजक मेक्सिकोले विगत ४० वर्षमा पहिलो पटक विश्वकपको नकआउट खेल जित्दै अन्तिम १६ (Round of 16) मा आफ्नो स्थान सुरक्षित गरेको हो।

पहिलो हाफमा मेक्सिकोले देखाएको उत्कृष्ट र आक्रामक खेल नै जितको मुख्य आधार बन्यो। एस्टेका रंगशालामा मेक्सिकोको घरेलु दर्शकहरूको ठूलो र उत्साहजनक समर्थन  पाएको थियो । 

खेलको २२ औं मिनेटमा जुलियन क्विनोनेसले डि-बक्सको छेउबाट एउटा प्रहार गर्दै उत्कृष्ट गोल  मार्फत मेक्सिकोलाई सुरुवाती अग्रता दिलाए। खेलको ३१ औं मिनेटमा इक्वेडरको रक्षापंक्तिको गल्तीको फाइदा उठाउँदै स्टार स्ट्राइकर राउल जिमेनेजले गोल गरे। इक्वेडरका खेलाडीले ब्याक-पासमा गरेको कमजोरीलाई झट्टै नियन्त्रणमा लिँदै जिमेनेजले क्विनोनेससँग उत्कृष्ट 'गिभ एन्ड गो' को तालमेल मिलाए र एक शक्तिशाली प्रहार गर्दै बललाई जाली चुमाए।

मेक्सिकोको बलियो रक्षापंक्तिपहिलो हाफमै २–० को अग्रता लिएपछि पनि मेक्सिकोले गोलका थप अवसरहरू सिर्जना गरिरह्यो, यद्यपि उनीहरूले अग्रतालाई अझ बढाउन भने सकेनन्। तर, खेलभरि निरिह देखिएको इक्वेडरको आक्रमणले मेक्सिकोको बलियो रक्षापंक्तिलाई चुनौती दिन सकेन।

खेलको अन्तिम समय (९०+५ मिनेट) मा इक्वेडरका पिएरो हिन्कापीले रातो कार्ड पाएपछि इक्वेडरको पुनरागमनको बाँकी आशा पनि समाप्त भएको थियो।

मेक्सिकोले अब क्वाटरफाइनल प्रवेशका लागि इङ्ल्याण्ड र कंगोको विजेतासँग खेल्नेछ। 

खबरपाटी