रास्वपा पदाधिकारीका लागि कडा प्रतिष्पर्धा, केन्द्रीय सदस्यमा स्वर्णिमलाई सर्वाधिक मत

चितवनमा भैरहेको राष्ट्रिय स्वतन्त्र पार्टी (रास्वपा) को महाधिवेशनमा पदाधिकारीका लागि चुनावी प्रतिस्पर्धा शुरु भएको छ । केन्द्रीय सदस्यहरूको लागि भएको चुनावको प्रारम्भिक नतिजा सार्वजनिक भएसँगै पदाधिकारीका लागि चुनावी प्रतिष्पर्धा शुरु भएको हो ।

रास्वपाको विधानमा कूल १९ पदाधिकारी रहने व्यवस्था भए पनि ६ वटा पदका लागि चुनावी प्रतिष्पर्धा भएको हो । सभापतिमा रवि लामिछाने निर्विरोध निर्वाचित भैसक्नुभएको छ । वरिष्ठ नेतामा बालेन्द्र शाहलाई चयन गर्ने निश्चित छ ।

बाँकी रहेका पदहरूमध्ये एक खुला उपसभापति, एक महिला उपसभापति, एक खुला महामन्त्री, दुई खुला सह–महामन्त्री र एक महिला सह–महामन्त्री पदका लागि कडा प्रतिस्पर्धा हुँदैछ । अरु पदाधिकारीका लागि समावेशी सिद्धान्तका आधारमा पछि मनोनित गरिने रास्वपाले जनाएको छ ।

उपसभापतिमा डा. स्वर्णिम वाग्ले र विराजभक्त श्रेष्ठबीच प्रतिष्पर्धा छ । त्यस्तै महिला उपसभापतिमा सोबिता गौतम, इन्दिरा राना मगर र डा. तोसिमा कार्कीले उम्मेदवारी दिएका छन् ।

महामन्त्रीका लागि मनिष झा, कबिन्द्र बुर्लाकोटी, विपिन आचार्य, रञ्जु दर्शना, सागर ढकाल, गणेश पराजुली लगायतले दावी गरेका छन् । यस्तै, सह–महामन्त्रीका लागि हरि ढकाल, पुकार बम, असिम शाह, रिमा विश्वकर्मा, ज्वाला संग्रौला लगायत प्रतिष्पर्धामा छन् ।

९९ सदस्यीय केन्द्रीय सदस्यका लागि भएको चुनावको मतपरिणाम गएराति सार्वजनिक भएको छ ।

सार्वजनिक नतिजा अनुसार डा. स्वर्णिम वाग्लेले सर्वाधिक २६०७ मत ल्याउनुभएको छ । दोस्रोमा सोविता गौतमले २५९४ र तेस्रोमा शिशिर खनालले २४९५ मत ल्याउनुभएको छ । पदाधिकारीको लागि आज बिहान १० बजेसम्म मतदान प्रक्रिया सञ्चालन हुनेछ । 

खबरपाटी