बलुचिस्तानमा पाकिस्तानी सेना र विद्रोहीबीच भीषण झडप, २३ सैनिकको मृत्यु

काठमाडौं ।  पाकिस्तानको अशान्त बलुचिस्तान प्रान्तमा पाकिस्तानी सेना र बलुच विद्रोही समूह बलुच लिबरेशन आर्मीबीच भीषण झडप भएको छ । विभिन्न स्थानमा भएका यी सशस्त्र मुठभेडहरूमा पाकिस्तानी सेनाका कम्तीमा २३ जना सैनिकको मृत्यु भएको पुष्टि गरिएको छ ।

बीएलए का प्रवक्ता जायद बलुच का अनुसार, मुठभेडमा संगठनका ९ जना लडाकुहरू पनि मारिएको बताएका छन् । उनका अनुसार झडपको एक मुख्य घटना गोनी पारा क्षेत्रमा भएको थियो, जहाँ पाकिस्तानी सेनाले आफ्ना कमान्डोहरूलाई हेलिकप्टरमार्फत पठाउनु परेको थियो ।

मस्तुंग क्षेत्रमा सुरु भएको भिडन्त, अन्य स्थानमा पनि झडपहरू
बीएलाका प्रवक्ताले बताएका अनुसार, ६ जून शुक्रबार राति पाकिस्तानी सेनाले बलुचिस्तानको मस्तुंग क्षेत्रमा सैन्य गतिविधि बढाएपछि भिडन्त सुरु भएको हो। उक्त झडप शनिबार बिहानसम्म चल्यो, जसमा ८ जना पाकिस्तानी सैनिकको ज्यान गएको र धेरै घाइते भएको जनाइएको छ।

त्यसपछि ८ जून मा अर्को भिडन्तमा पनि पाकिस्तानी सेनाका धेरै जवान मारिएको रिपोर्ट छ। प्रवक्ताका अनुसार अन्य थुप्रै स्थानहरूमा पनि सशस्त्र भिडन्तहरू जारी छन्।

सैन्य भिडन्तसँगै बलुचिस्तानमा नागरिकहरूमाथिको दमन पनि बढ्दै गएको छ। बलुच नागरिक समूहहरूको भनाइ अनुसार, पछिल्लो केही दिनमा प्रान्तका दुई फरक क्षेत्रबाट ९ जना नागरिकहरूलाई बलपूर्वक बेपत्ता पारिएको छ।

द बलुचिस्तानको को रिपोर्ट अनुसार, सुरक्षाकर्मीहरूले पासनी क्षेत्रमा दुई जनालाई पक्राउ गरी अज्ञात स्थानमा लगेका थिए। त्यसैगरी सोमबार बिहान, पाकिस्तानी सुरक्षाबलहरूले केच जिल्लाको दश्त बालनिगोर क्षेत्रमा छापा मारेर ७ जना युवाहरूलाई नियन्त्रणमा लिई बेपत्ता बनाएको जनाइएको छ।

वर्षौंदेखि जारी बेपत्ता बनाउने प्रवृत्तिको कडा निन्दा
बलुचिस्तानमा जबरजस्ती बेपत्ता पारिने घटनाहरू कुनै नयाँ कुरा होइनन्। नागरिक अधिकार समूहहरू र मानवअधिकार अभियन्ताहरूले लामो समयदेखि पाकिस्तानी सुरक्षाबलहरूले बिना वारेन्ट र कानुनी प्रक्रिया नागरिक, विद्यार्थी तथा राजनीतिक कार्यकर्ताहरूलाई निशाना बनाउँदै आएको आरोप लगाउँदै आएका छन्।

टीबीपी को रिपोर्ट अनुसार, अपहरण गरिएका व्यक्तिका परिवारहरूलाई कुनै कानुनी सहारा नदिइने, दिनदहाडै उठाइने जस्ता घटनाहरू सामान्य बनिरहेका छन्। मानव अधिकार समूहहरूले यी घटनाहरूको कडा निन्दा गरेका छन् र पाकिस्तान सरकारसँग जवाफदेहिता सुनिश्चित गर्न आग्रह गरेका छन्।

खबरपाटी